حلوى شكولا محشية بالنستلي

 
بالنسبة للمقادير :

02علب شكولا امباسادور سوداء (عن تجربة استعملوها تعطيكم نتيجة روووووووووووووعة )
علبة نستلي كرمال
حشوة لوز او كاوكاو (استعملت التي تبقت من حشوة عرايش ، زادت فيه نص ممممممم)
ممكن الاستغناء عن حشوة وتحضيرها بالنستلي برك.


الطريقة بالصور كالعادة

نذوبو شكولا بدون اي اضافات واكرر دون اضافة اي شيء على حمام مائي

نخيرو مولات سيليكون حسب رغبتنا

باستعمال بانسو سيليكون نحاول نطلي وردات بطبقة شوية خشينة باش كي ننحوهم مايتكسروش خاصة بالنسبة للقلوب مهم جدا تكون خشينة سينو يتكسرو كي يبردو






ندخلهم ثلاجة يبردو ويحكمو روحهم مليح
انا نحضرها فالليل وكي ننوض صباح نلقاهم واجدين

تشاراك مغبر

 
المقادير :

كيلة زيت
كيلةزبدة او سمن (خدمت بيهم وملاح في زوج)
كيلة حليب
رشة ملح
ونلمها بالفرينة مغربلة 03مرات (بالنسبة للفرينة حتى تتحصلي على عجينة حاكمة روحها )
نديرها في كيس ونخليها ترتاح ساعة (ممكن اكثر)

الحشو: 
03كيلات لوز او جوز او كاوكاو +1/2كيلة سكر+ملعقة زبدة +قشور قارص ونلمها بماء زهر









 
نحضر الشربات:

كيلة سكر+3 كيلات ماء نحطهم على النار ونحسب 15 د بعدها نضيفلهم

عصير ليمون انا درت عصير حبة حبيتو يجي حامض مممممممم ونطفي

بعدما تبرد الشاربات نغطس فيها الحلوى ** مهم جدا تبرد شربات والا تفتت تشاراك تاعنا ***

ناخذ كيس فيه سكر رطب نحط فيه حبة التشاراك ونغلق ونحرك نحط الحلوى فوق

قرياج ولا سنيوة حتى تبس ونعاود نحطها في السكر الرطب كيما المرة الاولى وعند التقديم

نرش فوقها سكر رطب بالصفاية وهذا شكلها

تشاراك بالطلية

المقادير :

كيلة زيت
كيلةزبدة او سمن (خدمت بيهم وملاح في زوج)
كيلة حليب
رشة ملح
ونلمها بالفرينة مغربلة 03مرات (بالنسبة للفرينة حتى تتحصلي على عجينة حاكمة روحها )
نديرها في كيس ونخليها ترتاح ساعة (ممكن اكثر)

الحشو: الطريقة الاولى تقليدية
03كيلات لوز او جوز او كاوكاو +1/2كيلة سكر+ملعقة زبدة +قشور قارص ونلمها بماء زهر
الطريقة الجديدة: 03كيلات كاوكاو+كيلة جلجلان+ملعقة حلوة ترك ونلمها بالمعجون

القلاصاج:

بياض بيضة+03ملاعق كبيرة ماء زهر+03ملاعق كبيرة زيت+03ملاعق كبيرة عصير ليمون ونلمها بسكر قلاص مغلابل 03مرات قبل
***من اراد تلوين قلاصاج يذوبو فالاول مع 03ملاعق كبيرة ماء زهر للحصو على قلاصاج جميل جدا
بالطريقة هذي يجوك نفس الشكل جميعا

قطايف البابا روووووعة

                                    قطايف البابا

طريقة التحضير بالصور :

نعسلوهم بعسل مخفف بقليل من ماء زهر ونزينهم بمكسرات من فوق ونرش عليهم ملمع

ممكن حشوهم بلوز مرحي ونزيدولو سكر ونلمها بقليل جدا من ماء زهر ونضعها في وسط القطايف ويخرج شكلها هكذا

طرطة باردة

المقادير :
03بيضات
03ملاعق كبيرة سكر
06ملاعق كبيرة حليب
06ملاعق كبيرة زيت
06ملاعق كبيرة فرينة
02ملاعق كبيرة كاكاو تاع ميزان
01خميرة
رشة ملح
نخلطهم مع بعض مليح بالترتيب ونزيد فرينة مخلطة مع كاكاو وخميرة فالاخير
الى الفرن 180درجة







كريمة :
نص لتر اواكثر عصير برتقال (انا استعملت علبةعصير نقاوس برتقال وخوخ)
سكر تذوقوها وانتم تحددو حلاوة
نشاء حوالي 03ملاعق كبيرة
نخلط كل شيء بارد في بارد ونحطو على نار باش يحكم روحو شوية

باش مانزوقش بزاف الطرطة حبيت نعمل ديكور بسيط وشباب في نفس الوقت
قصيت حلقات من كيوي وحطيتهم فوق طرطة وصبيت عليها كريمة وخليتها باتت
(حضرتها فالليل باش غد من داك تجي خفيفة ومريحة وماتغلبنيش فالتقاطع

ملاحظة: باش تجيك كريمة عالية ماتستعمليش مول كبير
ولا استلزم عليك مول كبير ضاعفي مقادير كريمة

حلوى بوشون (حلوى غطاء قارورة)

المقادير:
4 بيض
كاس سكر
كاس زيت
2 ملاعق أكل كاكاو
2 خميرة كيميائية
فانيليا
فرينة

التحضيــر:
نقسم المقادير إلى قسمين لأننا سنقوم بعمل عجينتين عجينة نتركها بيضاء اللون وأخرى نضيف لها الكاكاو
نخلط في كل قسم: 2بيض+ نص كاس سكر + نص كاس زيت + 1خميرة كيميائية + فانيليا
العجينة التي نتركها بيضاء نضيف لها الفرينة حتى نتحصل على عجينة متماسكة لكن يجب أن لا تكون متماسكة جيدا (العجينة لازم تكون ناقصتها الفرينة شوية)
نضيف للقسم الثاني 2 ملاعق أكل كاكاو
نضيف الفرينة مثلما أضفنا للعجينة الأولى يجب أن لا تكون متماسكة جيدا













نجهز قلاصاج والتزيين حسب الخيال هنا بعض الاشكال زينتها
بالنسبة للقلاصاج: بياض بيضة +02مغارف كبار ماء زهر+02مغارف كبار عصير قارص+02مغارف كبار زيت+رشة ملح
نخلطوهم بالشوكة مليح وبداي زيدي سكر قلاص مغربل طبعا
ملاحظة: تقدري تخليه ابيض وتزيدي ملون ابيض
ولا حابة ملون زيدي لون الي حبيتيه

قنيدلات محشيين بالنستلي وكورن فلكس

 
المقادير:


اول شيئ تضربي 250غ من الزبدة الطرية بالضراب الكهربائي مع 125غ من السكر الناعم

+ قرصة صغيرة ملح + بيضتين تضيفيهما على التوالي

+مبشور ليمونة و هذا إختيارين وقف الضراب الكهربائي

و نبدى نزيد كمية من الفرينة نضيفها شوية شوية

حتى تلتم الحجينة و تكون متماسكة و طرية

نكونو وجدنا ليكيسات حديدية (شرط مهم جدا مايكونوش عاليين بزاف كيما تاع قنيدلات

انا اخترت شكل مربع

نعمل رات صغار وندير العجينة داخل ليكيسات ونضغط مليح بيدينا على العجينة باش تاخذ شكل ليكيسات مربعة

نكملو كل العجينة ونديرها في بلاطو الى الفرن الساخن على درجة حرارة 200 درجة تقريبا

نخليها تبرد مليح وننحيهم من الكيسات حديدية

في هذا الوقت نكون وجدت نستلي تاعي

لك الخيار في شرائه واجد (تنحي الغلاف الي على العلبة وتحطيه داخل طنجرة ضغط وتعمريها ماء وتقفلي عليها وتخليه حوالي ساعة )

خليه حتى يبرد باش تفتحي علبة نستلي مهم جدا حتى يبرد لانه ساخن وقادر ينفجر

اما اذا اخترتم صناعته منزليا سأدرج ان شاء الله طريقة بالخطوات مصورة

*نضع داخل كل واحدة حوالي ملعقة كبيرة من نستلي بارد


ونزينة بالكورن فلكس نحاول صنع وردة وفي الوسط نضع ملعقة صغيرة من شكولاطة مذوبة


وحين تبرد نضع عليها ايضا قليلا من قلاصاج ابيض



هنا اذا اردتي اهدائها شوفو شكلها ماشاء الله




هذا هو كورن فلكس لمن لا يعرفه